Supolny muzyčny praekt "Ja naradziŭsia tut" - Pahonia (vierš M. Bahdanoviča) | Текст песни

• Тексты песен
• Supolny muzyčny praekt "Ja naradziŭsia tut"
• Pahonia (vierš M. Bahdanoviča)

«ПАГОНЯ»
Максім Багдановіч (1891-1917)

Толькі ў сэрцы трывожным пачую
За краіну радзімую жах, -
Успомню Вострую Браму сьвятую
І ваякаў на грозных канях.

У белай пене праносяцца коні, -
Рвуцца, мкнуцца і цяжка хрыпяць...
Старадаўняй Літоўскай Пагоні
Не разьбіць, не спыніць, не стрымаць.

У бязьмерную даль вы ляціце,
А за вамі, прад вамі - гады.
Вы за кім у пагоню сьпяшыце?
Дзе шляхі вашы йдуць і куды?

Мо яны, Беларусь, панясьліся

За тваімі дзяцьмі ўздагон,
Што забылі цябе, адракліся,
Прадалі і аддалі ў палон?

Бійце ў сэрца іх - бійце мячамі,
Не давайце чужынцамі быць!
Хай пачуюць, як сэрца начамі
Аб радзімай старонцы баліць...

Маці родная, Маці-Краіна!
Не ўсьцішыцца гэтакі боль...
Ты прабач. Ты прымі свайго сына,
За Цябе яму ўмерці дазволь!..

Усё лятуць і лятуць тыя коні,
Срэбнай збруяй далёка грымяць...
Старадаўняй Літоўскай Пагоні
Не разьбіць, не спыніць, не стрымаць.

[1916 год]

Supolny muzyčny praekt "Ja naradziŭsia tut" еще тексты